ترقی و خوشحالی دے رستے اچ کرپشن ھک وݙی رکاوٹ اے، معاشرتی اقدار دا زوال کرپشن دی شرح ودھیندے ، وزیرِ اعظم شہباز شریف دا پیغام

اسلام آباد۔9دسمبر(اے پی پی) وزیراعظم محمد شہبازشریف کرپشن دے ناسور مکاوݨ کیتے عزم دی تجدید کریندے ہوئیں ایں ڳالھ تے زور ݙتے جو کہیں وی ملک دی ترقی و خوشحالی دے رستے اچ کرپشن ھک وݙی رکاوٹ اے ۔ کرپشن کہیں وی ملک دیاں پاڑاں کوں کھوکھلا کرتے ایندی معاشی و انتظامی تباہی دا باعث بݨدی اے ، معاشرتی اقدار دا زوال کہیں وی معاشرے اچ کرپشن دی شرح کوں ودھا ݙیندے ۔ جمعہ کوں انسدادِ کرپشن دے عالمی ݙینھ دے موقع تے وزیراعظم آکھیے جو 2022 اچ انسدادِ کرپشن دے عالمی ݙینھ تے کرپشن دے کہیں وی ملک دی سلامتی، امن اتے ترقی نال براہِ راست تعلق کوں اجاگر کیتا ویندا پئے ۔ کرپشن نال ملک تے قوم دا قیمتی پیسہ نہ صرف شرپسند عناصر دے ہتھاں ونڄݨ دا خطرہ ودھ ویندے جیں توں ملک دا امن تباہ تھی ویندے بلکہ ایں ادارے کمزور اتے لوکاں دا گورننس توں اعتبار اٹھی ویندے ۔ اڄ دا ݙینھ ایں عہد دی تجدید دا وی ݙینھ جو اساں سارے پاکستانی رل تے کرپشن نال جنگ اچ سرخرو تھیووں ۔ مسلم لیگ ن ہمیشہ ملک توں کرپشن مکاوݨ کیتے عملی اقدامات چاتے ۔ 2013 توں 2018، مسلم لیگ ن دے دورِ حکومت اچ ناصرف ملک اچ کرپشن دی شرح تلے آئی ، جیں دی گواہ بین الاقوامی ادارے ٹرانسپرنسی انٹرنیشنل دے انڈیکس ہن، بلکہ وفاقی اتے صوبہ پنجاب دی سطح تے ارباں ڈالر دے سی پیک اتے ݙوجھے ترقیاتی منصوبے شروع کرتے پایہ تکمیل تئیں پڄائے مگر کوئی وی انہاں اچ ھک ݙھیلے دی کرپشن ثابت نہ کر سڳیا۔اڄ دے ݙینھ انسدادِ کرپشن ݙینھ تے میں ایں ڳالھ تے وی زور ݙیساں جو پاکستان دی سیاست اچ کرپشن کوں انتقام دا ذریعہ بݨاوݨ دے رواج کوں ختم کرݨا ہوسی ، گزرییل دور اچ جیں طریقے نال کرپشن دے کوڑے الزامات لا تےسیاسی حریفاں کوں جیلاں اچ بند کیتا ڳئٖ ایندی مثال نی ملدی ، کرپشن کوں ذاتی انتقام دی بھینٹ چڑھاوݨ کیتے آلے دے طور تے استعمال کیتا ڳئے۔ ایں روایت کوں ختم ہووݨا چاہیدے تاں جو اداریں کوں محض کرپشن دے ناں تے استعمال کرݨ دی بجائے صحیح معنے اچ ملک اچ کرپشن مکاوݨ کیتے اداریں کوں مضبوط کیتا ونڄ سڳے ۔ وزیراعظم آکھیے جو کرپشن ھک ٻہوں وݙا قومی مسئلہ اے ، اساکوں آپݨی سیاسی ڳالھ مہاڑ اچ وی ایں ڳالھ دا دھیان رکھݨ دی لوڑھ اے تاں جو اینکوں سیاسی نعرے بازی تے پوائنٹ سکورنگ کیتے استعمال دی بجائے سنجیدگی نال ایں ملک توں کرپشن دے سد باب دے اقدامات تے رل تے کم کروں ۔ انہاں آکھیے آؤ انسدادِ کرپشن دے ایں عالمی ݙینھ دے عہد کروں جو اساں رل تے ایں خواب کوں شرمندہ تعبیر کریسوں ۔

مضمون کا ماخذ : رومن دولت

متعلقہ مضامین